Narayaneeyam Dasakam - 38
nārāyaṇīyaṁ aṣṭātriṁśadaśakaṁ 38 – śrīkr̥ṣṇāvatāram
ānandarūpa bhagavannayi tē:’vatārē
prāptē pradīptabhavadaṅganirīyamāṇaiḥ |
kāntivrajairiva ghanāghanamaṇḍalairdyā-
māvr̥ṇvatī virurucē kila varṣavēlā || 38-1 ||
āśāsu śītalatarāsu payōdatōyai-
rāśāsitāptivivaśēṣu ca sajjanēṣu |
naiśākarōdayavidhau niśi madhyamāyāṁ
klēśāpahastrijagatāṁ tvamihā:’virāsīḥ || 38-2 ||
bālyaspr̥śāpi vapuṣā dadhuṣā vibhūtī-
rudyatkirīṭakaṭakāṅgadahārabhāsā |
śaṅkhārivārijagadāparibhāsitēna
mēghāsitēna parilēsitha sūtigēhē || 38-3 ||
vakṣaḥsthalīsukhanilīnavilāsilakṣmī-
mandākṣalakṣitakaṭākṣavimōkṣabhēdaiḥ |
tanmandirasya khalakaṁsakr̥tāmalakṣmī-
munmārjayanniva virējitha vāsudēva || 38-4 ||
śauristu dhīramunimaṇḍalacētasō:’pi
dūrasthitaṁ vapurudīkṣya nijēkṣaṇābhyām |
ānandabāṣpapulakōdgamagadgadārdra-
stuṣṭāva dr̥ṣṭimakarandarasaṁ bhavantam || 38-5 ||
dēva prasīda parapūruṣa tāpavallī-
nirlūnadātra samanētra kalāvilāsin |
khēdānapākuru kr̥pāgurubhiḥ kaṭākṣai-
rityādi tēna muditēna ciraṁ nutō:’bhūḥ || 38-6 ||
mātrā ca nētrasalilāstr̥tagātravallyā
stōtrairabhiṣṭutaguṇaḥ karuṇālayastvam |
prācīnajanmayugalaṁ pratibōdhya tābhyāṁ
māturgirā dadhitha mānuṣabālavēṣam || 38-7 ||
tvatprēritastadanu nandatanūjayā tē
vyatyāsamāracayituṁ sa hi śūrasūnuḥ |
tvāṁ hastayōradhr̥ta cittavidhāryamāryai-
raṁbhōruhasthakalahaṁsakiśōraramyam || 38-8 ||
jātā tadā paśupasadmani yōganidrā
nidrāvimudritamathākr̥ta pauralōkam |
tvatprēraṇātkimiva citramacētanairya-
ddvāraiḥ svayaṁ vyaghaṭi saṅghaṭitaiḥ sugāḍham || 38-9 ||
śēṣēṇa bhūriphaṇavāritavāriṇā:’tha
svairaṁ pradarśitapathō maṇidīpitēna |
tvāṁ dhārayan sa khalu dhanyatamaḥ pratasthē
sō:’yaṁ tvamīśa mama nāśaya rōgavēgān || 38-10 ||
iti aṣṭātriṁśadaśakaṁ samāptam |
